දුක සතුට මැද 2010 අවසාන විය.....

2010 අවසානයි
ලද දේවල් ගොඩාරියයි
නොලද ඒවා ගොඩාරියයි
2011 ට අරගෙන යන
සිතුම් පැතුම් ගොඩාරියයි
දුක් වුන තැන් ගොඩාරියයි

සතුටු වූ තැන් බොහොම ටිකයි

ගොඩක් තිබ්බේ දුකම වුනත්
විඳෙව්වේ නෑ හිතට අරන්
සුසුම් හෙලා කඳුලු සලා
දුක අරගෙන දියකර මම
හැරියෙමි එය පා කරලා

ටිකක් තිබ්බ සතුට අරන්
වින්දෙමි මම ගොඩාරියක්
සතුට යලිත් සිහිකරමින්
සතුටු වුනෙමි තවත් වරක්
නව වසරෙත් එහෙම වේවි
සැලෙන්නෙ නෑ කිසිවිටෙකත්

මේ වසරෙදි වුන දේවල්
සෙමින් හැරී හොරෙන් බලා
ලබන වසර වෙත යන්නෙමි
දෙනෙත් හැරා
හොඳින් බලා

  

ලබන්නා වූ 2011 නව වසර ඔබගේ සිතුම් පැතුම් ඉටුවන වාසනාවන්ත සුභ නව වසරක් වේවා!!!!!

එපා නැවත ඔන්ලයින් ප්‍රේමයක්......

මූණුපොතෙන් හමුවී දොඩා
ඇය 'බොරුව' නම් ලැංවේජයෙන්
'ආදරය' නැමැති වෛරසය සාදා
මගේ 'හදවත' නැමති හාඩ් ඩිස්කයට
ඇතුලු කළාය
අපි ස්කයිපයෙන් මල් කැඩුවෙමු
එකල ප්‍රේමය ඔන්ලයින්ය
මූණුපොතෙන්ම ලද විශ්වාස කටයුතු
ආරංචි නිසා

'මම' නැමති සිස්ටමයට
'අවිශ්වාසය' නැමති ස්පයිවෙයාරයද ඇතුලුවී
'මම' නැමති සිස්ටම් එක අවුල් කළේය
"හැමදේම වෙන්නේ හොඳටයි" නැමැති
වෛරස් ගාඩය යෙදූ මම
වෛරසය ඉවත් කළෙමි
දැන් 'ආදරය' නැමති වෛරසය නැත
'අවිශ්වාසය' නැමති ස්පයිවෙයාරයද නැත
නමුත්
වෛරසය මැකී යාමේදී
'හදවත' නැමති හාඩ් ඩිස්කය
පළුදු වී ඇත
ඒවා කෙමෙන් කෙමෙන්
යථා තත්වයට පත් වෙමින් පවතියි
ඒ ප්‍රේම කතාව දැන් සදහටම ඕෆ්ලයින්ය

ප.ලි: ඇය හමුවූ දා සිට මා ඇයට අවසාන ඊමේලය යවන දිනය දක්වාම 'ආදරය' නැමති වෛරසය මෙන්ම තව දුක, සතුට, තරහව ආදී තව නොයෙක් නොයෙක් කුඩා ප්‍රෝග්‍රෑම සෑදීම සඳහාද භාවිතා කර තිබුණේද 'බොරුව' නැමති ලැංවේජයයි. 

පොෂ් (පුස්) කට්ටිය (සත්‍ය කතා කීපයක්)

අපි ඒ ලෙවල් ඉවර වෙලා උසස් අධ්‍යාපනේ විශ්වවිද්‍යාලෙකින් හරි වෙනයම් පෞද්ගලික අධ්‍යාපන ආයතනයකින් හරි ලබාගන්න යනවනේ. එතකොට බොහෝමයක් වෙලාවට අපිට ඒ දේවල් කරන්න වෙන්නේ කඩ්ඩෙන්. විශ්වවිද්‍යාල වල කෙසේ වෙතත් පෞද්ගලික අධ්‍යාපන ආයතන වලට එනවා පොඩිකාලේ ඉඳන්ම කඩ්ඩෙන් ඉගෙන ගත්තු කට්ටිය. සමහර අය හරි අමාරුවෙන් සිංහල කතා  කරන්නේ. තවත් කට්ටිය බොරුවට පේන්න සිංහල බෑ වගේ කතා කරනවා. කොහොම හරි මේ තියෙන්නේ ඒ වගේ සමහර අයගේ ගැන ඇත්තම ඇත්ත සිද්ධීන් කීපයක්.

ඔන්න ඉතිං ඉන්නවා එක කොල්ලෙක්. මිනිහා හරිම පොෂ් හරි අමාරුවෙන් සිංහල කතාකරන්නේ. හැබැයි මිනිහා සිංහල බෞද්ධ. සිංහල ලියන්න පොඩ්ඩක්වත් බෑ කියවන්නත් බෑ. මිනිහගෙන් අහුවාම මිනිහා සිංහල ලියන්න කියවන්න බෑ කියන්නේ බොහෝම ආඩම්බරෙන්. හැබැයි මම හොඳටම දන්න දෙයක් මිනිහගේ දෙමව්පියෝ මිනිහත් එක්ක සිංහලෙන් කතාකරනවා. අපි එයාට මෙනැන් ඉඳන් සුපුන් කියමුකෝ.

දවසක් මමයි මගේ යලුවෙකුයි අවසන් වරට වෙනස් වූ අය වැය ගැන සාකච්චාවක්. සුපුන් ළඟින් ඉන්නවා එයාගේ මාමා ඇමෙරිකාවෙන් එවපු ලැප්ටොප් එක ඔබ ඔබා.

සුපුන්: මොකක්ද බං අය වැය කියන්නේ?

මම: (කතාකරමින් සිටි යාලුවාට) මූට ඉතිං සිංහල බෑනේ. කඩ්ඩෙන් කිව්වම තේරෙයි. (සුපුන්ට)අය වැයට කඩ්ඩෙන් කියන්නේ බජට් එක කියලා. දැන් උඹට තේරුනා නේද මොකක්ද අය වැය කියන්නේ කියලා.

සුපුන්: ආහ් හරි හරි.

ආයෙත් මමයි යාලුවයි කතාව පටන් අරන් ටිකක් වෙලා යනකොට

සුපුන්: මේ...... මොකක්ද බං බජට් එකෙන් වෙන්නේ?
මගේ කටට ආවා හොඳ වචන දෙක තුනක් අමාරුවෙන් ඒවා නවත්තගෙන සුපුන්ට සරලව පැහැදිලි කළා මොකක්ද බජට් එක කියන්නේ කියලා. කියපුවා තේරුනාද දන්නේ නෑ.

------------------------------------------------------------------------------

මේ කතාවත් සුපුන් ගැනමයි.

සුපුන්ගේ තියෙන්නේ හරි ලොකු කතා. කතා කලොත් කතා කරන්නේ කෝටි ගණන් වලින්. ඒත් කිව්වම මොකෝ හදිස්සියකට සුපුන්ට කෝල් එකක් දෙන්න ගියාම අපිට පිස්සු හැදෙනවා මොකද අද කාලේ මොන්ටිසෝරි ළමයි ළඟ උනත් තියන ජංගම දුරකතනයක් සුපුන්ගාව නැති නිසා. තව දවසක්

මම: මචං ෆෝන් එකක් ගනිංකෝ බං හදිස්සියකට උඹට කෝල් එකක්වත් දෙන්න විදිහක් නෑනේ.

සුපුන්: එකක තිබ්බා බං

මම: කොහේද ඇමෙරිකාවේ මාමා ගාවද?

සුපුන්: නෑ බං මා ගාව තිබ්බා N95 එකක්.

මම: නෑ....... කෝ ඉතිං ඒක?

සුපුන්: ඒක නැති උනානේ බං.

මම: අපරාදේ කවුරුහරි හොරකම් කරලද?

සුපුන්: නෑ බං.

මම: එහෙනම්

සුපුන්: මගේ කාමරේ මචං ඇඳවල් දෙකක් තියනවා. එකක් ලැප්ටොප් එක තියාගෙන වැඩ කරන්න. අනික නිදාගන්න. ඔය ලැප්ටොප් එක තියන ඇඳ ටිකක් හැඩිවෙලා තියෙන්නේ. ඒකේ උඩ ෆෝන් එක දැම්මා දැන් ඒක නෑ බං.

සුපුන් මට ඔය කතාව කියලා දැන් මාස 6කට කිට්ටුයි. හැබැයි මිනිහට තාම ෆෝන් එක හම්බවෙලා නෑ. අනේ උගේ N95 ........

------------------------------------------------------------------------------ 

මේ කතාවට සම්බන්ධ කෙනාගේ නම අපි තරුෂි කියලා ගමුකෝ.
ඔන්න දවසක් මම යාලුවෙක් එක්ක ළමයි පොඩි කාලේ ඉඳන්ම ඉනර්නැෂනල් ඉස්කෝල වලට යැවුවාම එයාලට අපේ සංස්කෘතිය, අතීතය ගැන දැනුමක් නැති තරම් කියලා කතාවෙනවා.

මම: බලපන් දැන් අපේ සුපුන් මිනිහට සිංහලත් බෑ. ආයේ උගෙන් අතීතේ ගැන මුකුත් අහන්න පුළුවන්ද?

සුපුන්: (ආඩම්බරෙන්)අනේ අනේ මේ මගෙන් නම් ඕවා අහන්න එපා. මම ඕවා දන්නේ නෑ.

මම: බලපන් දැක්කනේ... තරුෂිත් ඔයවගේම තමයි.

තරුෂි: අනේ මේ ඉන්නවා... මට සිංහල ලියන්න කියවන්න පුලුවන් ඉන්ටර්නැෂනල් ගියාට මම අපේ රටේ සංස්කෘතිය අතීතෙ දන්නවා.

මම: හරි එහෙනම් මම ඔයාගෙන් ප්‍රශ්නයක් අහන්නද?

තරුෂි: හා අහන්න ඕන එකක්.

මම: හ්ම්ම්ම්ම්ම් හරි කියන්න බලන්න කවුද විජය කුමාරයා කියන්නේ කියලා.

තරුෂි: අයියෝ ඕකද ප්‍රශ්නේ..... ඕක සිම්පල් නේ.

මම: හරි ඉතිං සිම්පල් නම් උත්තරේ දෙන්නකෝ.

තරුෂි: විජය කියන්නේ............. චන්ද්‍රිකාගේ හස්බන්ඩ්නේ අනේ.

චන්ද්‍රිකාගේ හස්බන්ඩ්????  o_O මොකටද මගේ කට...........

ඔන්න පොෂ් කට්ටිය. පොෂ් ද පුස් ද?

සමහරු හිතන් ඉන්නේ සිංහල බැරි කම තමයි පොෂ් කියන්නේ කියලා. පොෂ්????? මොකක්ද හැබෑට ඔය පොෂ් කියන්නේ......

ගණිකාව............

වලත්තකම නිසාද බං ඕවා කරන්නේ

නෑ බං ලේසියෙන් සල්ලි හොයන්න පුලුවන් නිසානේ

ඉතිං ඒ වලත්තකම තමයි යකෝ

උඹට පිස්සු ඉගෙන ගත්තේ නැති ඒ ගෑණිට ඔය තරම් සල්ලි හොයන්න පුලුවන් වෙන රස්සාවක් කියපං පුලුවන්නම්

කුඩු බිස්නස්

උඹ හිතුවද කුඩු ගෙදර හදනවා කියලා ඊට වඩා ඕක ලේසිනේ බං

ලේසි... ලේසි නෙමේ උන්ට කියන්නේ *සි

කව්ද දන්නේ බං උන්ගේ ගෙවල් වල මොන මොන විදිහේ ප්‍රශ්න තියනවාද කියලා. උන් ඕක කරලා හොයන ගානෙන් කීදෙනක්ව ජීවත්කරනවද කව්ද දන්නේ

ඒ වුනාට හොඳ ගෑනියෙක්ගෙන් අහපන් නොකා නොබී මැරිලා ගියත් ඔය වගේ ජරා වැඩ කරන්නේ නෑ කියලයි කියන්නේ

කෑම බීම ප්‍රශ්නද බං ඊට වඩා ප්‍රශ්න තියන මිනිස්සු නැද්ද ලෝකේ

උඹ මොකද උන්ව සාධාරණීකරනය කරන්නේ

නෑ බං මම කියන්නේ මේකයි වලත්ත කමට ඕවා කරන උනුත් අති සමහර විට වෙන කරන්නම දෙයක් නැති තැන ඕවා කරන උනුත් ඇති බං

උඹට පිස්සු *සි *සිමයි

උඹ ඕන එකක් හිතා ගනින්.....

සිංහල බ්ලොග් කරුවන්ගේ සුහද හමුවට පැමිණි චාටර් බුවාලා

Taboo subjects හි "කාලිංග අයියා බ්ලොග්කරුවන්ට දුන් සාඩම්බර එළවළු බත් දන්සැල" නමින් ලිපියකි. ඒ ලිපියට සබඳියක් ලබා දුන්නේ නැත්තම් මේ ලිපිය කියවන ඒත් ඒ ලිපිය නොකියවූ අයට කරන අසාධාණයක් නේ. ඔන්න ඒ නිසා සබඳියක් දැම්මා. කොහොමින් කොහොම හරි ටැබූ ලියලා තියෙන්නේ එයා දාපු ලිපිය එයාට කව්දෝ පාඨකයෙක් එව්වා කියලා. මම නම් ඉතිං කියන්න දන්නේ නෑ ඒ ඇත්තද බොරුද කියලා. ටැබූ කියන නිසා ඔන්න මම ඒක පිළිගන්නවා. ඉතිං මට පුදුම ඒක ලියපු කෙනා ඒක එයාගේ බ්ලොග් එකේ දාන්නේ නැතුව ටැබූට දුන්නේ ඇයි කියලා. සමහර විට ඒක ලියපු කෙනා කෙලින් කතා කරන්න බය කෙනෙක් වෙන්න ඇති. මටත් මොකක් හරි අසාධාරණයක් දැක්කාම කට පියාගෙන ඉන්න බැරි නිසා වගේම හැංගි හැංගි ලිපි ලියලා අනිත් උන්ට බාර දෙන්න අකමැති නිසා ඔන්න ඕන දෙයක් වෙච්චදෙන් කියලා මේක මගේ බ්ලොග් එකේම ලියනවා.

ඒ ලිපියට අදහස් තොගයක්ම වැටිලා. වැඩේ කියන්නේ එකම නමින් එක එක අය අදහස් දක්වලා. එක්කෙනෙක් එකක් කිව්වමා ඒ නමින්ම තව කෙනෙක් ඇවිත් කියනවා ඒ මම නෙමෙයි කියලා. මට පිස්සු වගේ ඇත්ත එකා හොයන්නත් බෑ බොරු එකා හොයන්නත් බෑ. කවුරු හරි අනුන්ගේ නමකින් අදහස් දක්වන්නේ. වෙන මොකක්ද ඉතින් බියගුලු ගතියනේ. ඒ ලිපිය ලියපු කෙනාගේ බ්ලොග් එක කාලිංග අයියලාගේ සින්ඩියේ නෑ මම හිතන්නේ. ඒ තරහටත් එක්ක තමයි ලියලා ඇත්තේ. මොනවා කරන්නද ඒ එයාගේ අදහස්නේ මේ මගේ ඒවා ඕං.

ඒ ලිපිය ලියූ  අහිංසකයා මුලින්ම සිංහල යුනිකේත විවේචනය කරලා. ඒත් වැඩේ කියන්නේ ඒ ලිපිය ලියලා පල කරලා තියෙන්නෙත් සිංහල යුනිකේත භාවිතා කරලමයි. ඊළඟ ඡේදෙන් කියලා තියෙන්නේ එතන හිටපු සමහර අයගේ බ්ලොග් අඩවි එයා කලින් අහලා නැතිලු. එයා ඒක කියන්නේ හරියට සින්ඩි ඔක්කෝගෙම තියන බ්ලොග් අඩවිටික එයාට කට පාඩමෙන් කියන්න පුළුවන් වගේ. බොරු බයිලා ඕනේ නෑ මම දන්නේ නැති බ්ලොග් අඩවිත් එතන ඕන තරම් තිබ්බා. ඇරත් මගේ බ්ලොග් අඩවිය උනත් වැඩි දෙනෙක් දන්නේ නෑ. ඒවා දැන ගන්න එක්ක තමයි සුහද හමුවක් තිබ්බේ. කමෙන්ට් මොඩරේට් කරන්නේ ඔය අනුන්ගේ නම් වලින් ඇවිත් කුණුහරුප දාන අයගෙන් වගේම නමක් ගමක් නැති කමෙන්ට් දාන අයගෙන් තමන්ගේ අඩවිය ආරක්සා කරගන්නනේ. නැත්තම් ඔල්මොරොන්දං උන් ඇවිත් ගොං කමෙන්ට්ස් දානවනේ. ලිපි ලිය ලියා අනුන්ට දීලා පලකරගන්න අයට ඔය ප්‍රශ්න තේරෙන්නේ නෑ.

කාලිංග අයියලා සුහද හමුවක් සංවිධානය නොකරන්න අපිට බ්ලොග් ලියන කියවන අයව හමු වෙන්නේ නෑනේ. මොකද ඔය පොර ටෝක්ස් දෙන කට්ටියට පුළුවන්ද ඒ වගේ දෙයක්වත් කරන්න. ඒක ලියපු කෙනා කියන විදිහට ඕං මාලිංග ගේ නම හැදිලා තියෙන්නේ මේ විදිහට වෙන්න ඇති. මහා+ලිංග= මාලිංග (සමාවෙන්න මේ තියරිය මගේ නෙමෙයි ඒ ලිපිය ලියපු කෙනාගෙමයි.)

ඒ ලිපිය ලියලා තිබ්බ ඔක්කොම ඒවා අරන් පහදන්න මට උවමනාවක් නෑ. ඒත් මම මෙහෙම කියන්නම් ඒ ලිපියේ තියන කිසිම දේකට මම එකඟ නෑ.

ඒ ලිපියේ තියන කමෙන්ට් ගොඩේ මාරයා කියලා දාපු කමෙන්ට් එකක් තිබ්බා. ඇත්තටම මාරයා අයියා දැම්මද නැද්ද කියලනම් දන්නේ නෑ. ඒකේ ඇත්තක් තියනවා "කාලිංග කරන දේ කාලිංග ගෙනියයි.
ඔබලා කරන දේ ඔබලා ගෙනියයි. කාලිංග අඩුම ගානේ එහෙමවත් කරනවා" ඉතිං ඔය මඩ ගහන එක පැත්තකින් තියලා වැඩකට ඇති වැඩක් කළානම් කොච්චර හොඳද. 

මට ගොඩාක් දුක හිතුනා ඒ ලිපිය ලියපු කෙනා කාලිංග අයියලා සල්ලි වියදම් කරලා හදලා අපිට නිකං දීපු බත් එක කාලා ගිහිල්ලා ලියලා තියන ලිපිය ගැන. මට ඉතිං ලියනවනම් ලියන්න තිබ්බා මීට වඩා දරුණු වචන වලින්. එහෙම ලියවෙයි කියලා තමයි ටැබූගේ ලිපිය දැකලත් පැය කීපයකට පස්සේ මේක ලියන්න ගත්තේ.

මගේ අදහස මේකයි ඒ ලිපිය කවුරු ලිව්වා උනත් ඒ කරලා තියෙන්නේ බොහෝම පහත් වැඩක්. මොකද එදා දවස පුරාම තිබ්බ දේවල් එකින් එකට අරන් ඒවා විවේචනය කරලා. ඒ කියන්නේ සුහද හමුව පිළිබඳ ඒ ලිපිය ලියපු පුද්ගලයට ලොකු ඊරිසියාවක් තිබිලා නැත්තම් මොකක් හරි වෛරයක් තිබිලා. නැත්තම් වෙච්ච හැමදේම වැරදියට දකින්නේ කොහොමද? කොහොමත් හොඳ වැඩක් කරන මිනිස්සුන්ට මඩ ගහන්න ඕන තරම් කට්ටිය ඉන්නවනේ. ඒ හැටි.

මට ඒ ලිපිය දැකලත් ඕනෙනම් කටපියන් ඉන්න තිබ්බා දැක්කේ නෑ වගේ. ඒත් කරුමේ කියන්නේ මට අසාධාරණේකදී එහෙම ඉන්න බෑ. 

කාට හරි මට බැනලා කමෙට් කරන්න ඕනෙනම් බයනැතුව ඒ අයගේ ඇත්ත ගිණුම් වලින් ලොග් වෙලා මට බැනලා යන්න. කලින්ම කියන්නම් මම කමෙට් මොඩරේෂන් දාලා තියෙන්නේ. හොඳක් කිව්වත් නරකක් කිව්වත් Anonymous කමෙට්ස් පබ්ලිෂ් කරන්නේ නෑ.

හැමදේම විවේචනය කරන්න නෙමයි හොඳ දේ හොඳ විදිහටත් නරක දේ නරක විදිහට දකින්නත් පුරුදු වෙයල්ලා.

බ්ලොග් කරුවන්ගේ හමුවේ වතගොත.....

ඔන්න ඉතිං මම උදේ පාන්දරින් මගේ යාලු අන්තිමයාත් එක්ක ගමන යන්න සෙට් උනා.  මිනිහා මට පැයක කට්ටක් සෙට් කළා නොවැ. කොහොමින් කොහොමින් හරි පාර හොයාගෙන ගොඩ උනා. 8.30 ට එන්ට කීවාට මොකෝ 9.30 පොඩ්ඩ්ඩක් පහු වෙලා වැඩේ පටන් ගත්තා. කාලිංග අයියා කිව්වේ එයාලා ප්ලෑන් කරල තිබ්බේ වැඩේ 9.30 ට පටන් ගන්නලු. 8.30 ට එන්න කිව්වේ කට්ටියගේ හැටි දන්න නිසා වෙන්න ඕනේ. මිනිහා මොළ කාරයා නිසා හොඳයි.
 
ඔන්න එතනට ගිය ගමන්ම පූසාට වත් අක්කාව මුණගැහුනා අප්පේ මාර සතුටුයි. බ්ලොග් අවකාශේ ප්‍රසිද්ධ චරිතයක් ඒ වගේම මම ආසාවෙන් කියවන බ්ලොග් එකක අයිතිකාරි. වැඩේ පටන් අරන් ඉතින් එක් එක් කෙනාව ඒ අය විසින් හඳුන්වා දුන්නා. පූසාත් කලින් කට්ටිය ඉස්සරහා ම්යික් කටුවකින් කතා කරලා තිබ්බේ නෑ ගැහි ගැහී හඳුන්වලා දුන්නා එයා ගැනම.

කාලිංග අයියා ඇතුලු පිරිසගේ කැපවීම ගැන විශේෂයෙන් සඳහන් කරන්න නම් ඕනෙමෙයි. නැත්තම් ඒක ලොකු අසාධාරනේකටත් වඩා ලොකු පවක්. මම ඒ අයියා කියනකම් දැනගෙන හිටියේ නෑ එයාලගේ සින්ඩිය වගේම මේ හමුව ඇතුලු නොයෙක් නොයෙක් වැඩ කටයුතු එයාලගේ අතින් වියදම් කරගෙන කරනවා කියලා. ඔයාලත් දැනගෙන හිටියේ නෑ නේද?

තව සුහද හමුව පවත්වන්න අනුග්‍රහය දක්වපු මයික්‍රොසොෆ්ට් ආයතනයටත් ස්තූති කරන්න ඕනේ. ඒකට සහාය දීලා තිබ්බේ අපේ කාලිංග අයියගේ යාලුවෙක් නේ. එයාටත් බොහෝම ස්තූතියි ඕං. අද ගොඩාක් කතා වුනේ තාක්ෂණික පැත්ත ගැන නිසා ඒ පිළිබඳ වැඩි දැනීමක් නැති උදවියටනම් ටිකක් කම්මැලි වුනා වගේ දැනුනා ඒ වෙලාව.

ඒ සේරම ඉවර වෙලා තමයි මට මාරයා අයියාවයි, මුචලින්දවයි සෙට් වුනේ. (මම කලින් පෝස්ට් එකේදී කිව්වනේ මුචලින්ද නිසා තමයි මම බ්ලොග් ලියන්න ආවේ කියලා) ඉතිං ඒ වගේ පුද්ගලයෙක් හම්බ වුනාම කොච්චර සතුටුයිද. පස්සේ ආව ඔක්කෝමලා සමූහ ඡායාරූපෙකටත් පෙනී හිටියා. තව අපිට දිවා ආහාර වේලකුත් ලෑස්ති කරලා තිබ්බානේ.

පස්සේ කාලා බීලා කට්ටියත් එක්ක චැට් එකක් දාලා පොටෝ ටිකක් එහෙම ගත්ත. ඔය වෙලාවේ තමයි අපේ මාරයා අයියා දකින දකින කැමරාව ඉස්සරහා හිටගන්න පටන් ගත්තේ. හරි අමාරු උනා මිනිහාව නවත්තන්න.

ඇත්තටම බොහෝම සතුටුයි බ්ලග් ලියන ගොඩාක් අයව හම්බ වෙලා කතා කරන්න පුලුවන් උනා. හම්බ උන ඔක්කෝගෙම නම් ලියන්න නම් අමාරුයි. කොහොමහරි මේක සංවිධානය කරපු අනුග්‍රහය දක්වපු හැමෝටම තව පාරක් ස්තූතියි.

ප.ලි: මේ පොටෝ ටික හොරකම් කලේ රෝස වලාකුළු ලියන නෙරංජිගෙන්.
ආ කියන්න අමතක උනා බ්ලොග් කියවන අයත් ආවා.

සිංහල බ්ලොග් කරුවන්ගේ හමුවේදී හමුවෙමු....

ගියපාර හමුවටත් යන්න බැරි වුන නිසා ඔන්න හෙටනම් මම අනිවා යනවා. මම දකින්න ආසා බ්ලොග් කාරයෝ කාරියෝ ගොඩාක් ඉන්නවා එයාලා ඔක්කොම එයිද කියන්න දන්නේ නෑ.


විශේෂයෙන් නම් සඳහන් කරනවානම්
මුචලින්ද,කතන්දර අයියා, මාරයා අයියා, වත් අක්කා,දුකා,දුමී,පලාමල්ල ලියන පිස්සා, මරණය, හසියා, හිස් අහස ලියන සඳරු, නිකමට වගේ ලියන සඳුන්, ළමයා,හැක්‍රිෂ්...... හපෝයි තව කොච්චර කට්ටිය ඉන්නවද...........


ඒත් මම නම් ලිව්ව නොලිව්ව ගොඩාක් අයට එන්න වෙන්නේ නෑ මම හිතන්නේ. මම දැක්කා සඳරු කලින්ම කියලා තියනවා එන්න වෙන්නේ නෑ කියලා. ඒ වගේම ගොඩාක් සිංහල බ්ලොග් ලියන අය පිට රටවල් වල ඉන්නේ. (මාරයා අයියත් මේදවස් වල පොඩි මඩ කේස් එකක නිසා එයිද දන්නේ නෑ ;) )


මම සිංහල බ්ලොග් එකක් කියලා මුලින්ම උවමනාවෙන් කියෙව්ව බ්ලොග් එක මුචලින්දගේ ටොපිය. මටත් බ්ලොග් එකක් ලියන්න හිතුනේ ඒක දැක්කාම. මුලින්ම ටොපිය දැක්කේ 2009 දී ඒක දැක්ක ගමන්ම බ්ලොගර් ගිණුමක් හදාගත්තාට මොකද මගේ බ්ලොග් එක පටන් ගත්තේ නම් මේ ළඟදී(ඔය මගේ ප්‍රෝෆයිලේ තියෙන්නේ 2009 ඉඳන් ඉන්නවා කියලා)


මේ හමුවට ඉතින් බ්ලොග් කියවන අයටත් එන්න පුලුවන්නේ. ඒකනම් හොඳ වැඩක්. අපේ බ්ලොග් අවකාශේ ප්‍රසිද්ධ අයට කොච්චරනම් ප්‍රේක්ෂක  පිරිසක් ඇද්ද. එයාලත් ආසයිනේ තමන් ආසාවෙන් බලන බ්ලොග් එකේ අයිති කාරයාත් එක්ක වචනයක් දෙකක් කතා කරන්න. මමත් ආසයි.

එහෙනම් හෙට හම්බවෙමු................

බීපං............

බීපං
හතුරෝ ඇතිකරගන්න නෙමෙයි
මිතුරෝ වැඩි කරගන්න

බීපං
පොඩි වෙලාවකට දුක අමතක කරන්න නෙමෙයි
බොන වෙලාවට සතුටින් ඉන්න

බීපං
බීලා රණ්ඩු වෙන්න නෙමෙයි
සින්දුවක් කියලා සොමියක් දාන්න

බීපං
දුක හිතෙන වෙලාවට නෙමෙයි
සතුටින් ඉන්න වෙලාවට

බීපං
ප්‍රශ්න වැඩි වෙලාවට නෙමෙයි
ප්‍රශ්න නැති වෙලාවට

බීපං
අනුන්ට ණය වෙලා නෙමෙයි
තමන්ගේ අතේ සල්ලි තියන වෙලාවට

පූසාගේ අවවාදය බීම දුක නැතිකර ගැනීම සඳහා හෝ ප්‍රශ්න විසඳා ගැනීම සඳහා සුදුසු ප්‍රතිකර්මයක් නොවන බවයි

දෙදෙනෙක්ට එකවර ආදරේ කිරීම.......

ඔන්න මුලින්ම කියන්නම් මම මේ ලිපියෙන් කතාකරන්නේ කෙල්ලෙක් එකවර කොල්ලෝ දෙන්නෙක්ට ආදරේ කිරීම ගැනයි. හැබැයි එකවර කෙල්ලෝ දෙදෙනකුට ආදරේ කරන කොල්ලොත් ඉන්නවා. ඒක ගැන ලිපියක් ලියන්න මට තේරෙන්නේ නෑ. ඔන්න අපේ ගැහැණු පාර්ශවයට බාරයි ඒ ගැන ලියන්න.

ඔන්න මුලින්ම කියන්නම් මේකත් ඉස්සෙලා ලිපියට (මූණු පොතෙන් ආදරය සොයා යාම) ටිකක් සම්බන්ධයි. මොකද මේ සිදුවීමත් වැඩිපුරම සිද්ධ වෙන්නේ අන්තර්ජාලය ඔස්සේ නිසා වගේම මේ සිදුවීමේත් මූලික පදනම වෙන්නේ "බොරුව" කියන එක නිසා.

මේ සිදුවීම සම්බන්ධයෙන් මම පොඩි අධ්‍යයනයක් කළා ඉතින් මම ඒ දේවල්. මාතෘකා යටතේ කරුණු වශයෙන් දක්වන්නම්.

කෙල්ලෙක් එකවර කොල්ලන් දෙදෙනෙකුට ආදරය කිරීම සම්බන්ධව කළ අධ්‍යයනයට කරුණු සපයා ගත් ආකාරය. 

• මාගේ අත්දැකීම්.

• පෙර ලිපිය අවසානයේ සඳහන් මට සිදුවූ සන්තෑසියම සිදුවූ මා මිතුරා සමඟ කළ සංවාදය.

• මගේ මිතුරන් විසින් පැවසූ ඔවුන්ගේ මිතුරන්ට සිදුවූ සිදුවීම්.

කෙල්ලෙක් එකවර කොල්ලන් දෙදෙනකුට ආදරය කිරීමට පෙළඹීමට හේතු.

• කොල්ලන් දෙදෙනෙකුට එකවර ආදරය කරමින් කාලයක් සිටිමින් ඔවුන් දෙදෙනාගෙන් වඩාත් හොඳ පුද්ගලයා තෝරා ගැනීමට. 

• වෙනත් රටක සිටින කෙල්ලෙක්නම් බොහෝවිට ඇයගේ පාලුව නිවාගැනීමට( කොල්ලෝ දෙන්නෙක් එක්ක යාලු වෙලා ඉන්නේ මේකයි කොල්ලෝ දෙන්නට වෙලාවක් දෙකක් දීලා තියනවා එක්කෙනෙක් එක්ක කතාව ඉවර වුනාම අනිත් කෙනාත් එක්ක. එතකොට කෙල්ලට කම්මැලි නෑනේ. ගොඩාක්වෙලා ඔහේ කියව කියවා ඉන්න පුළුවන්නේ)

• දෙදෙනක් සමඟ යාලු වී සිටින විට ඔවුන්ගෙන් ලැබෙන තෑගි ආදිය නිසා.(එක්කෙනෙක් එක්ක ඉන්නකොට වගේ නමෙයිනේ දෙන්නෙක් එක්ක ඉන්නකොට )

(තවද මෙම ලිපියේ සභ්‍යත්වය ආරක්ෂා කළ යුතු බැවින් සඳහන් කළ කොහැකි හේතූන් කිහිපයක්ද ඇත.)

පිටරට සිටින කෙල්ලන්, දෙදෙනෙකුට එකවර ආදරය කිරීම සඳහා එරට කෙනෙක් සොයා නොගෙන ලංකාවේ කොල්ලන්වම අල්ලා ගන්නේ ඇයි?

• එරට සිටින ලංකාවේ කොල්ලන් දෙදෙනෙක් අල්ලා ගත්තද වැඩේ මාට්ටු වුන දවසට දෙදෙනාගෙන්ම රිටර්න් එක ලැබේ යැයි ඇති බිය.

• ලංකාවේ කෙල්ලන්ට සුද්දෙක්ව දැලේ දාගැනීම පහසු නොවීම.

• අමාරුවෙන් හෝ සුද්දන් දෙදෙනකු දැලේ දාගෙන සිටින විට උන්ට මාට්ටු වුනොත් උන්ගෙන් ලැබෙන රිටර්න් එක පිළිබඳව සිතා ගැනීමටවත් නොහැකිවීම.

• කෙල්ල  වෙනත් රටක සිටින නිසා එරට රැදී සිටින ලංකාවේ කොල්ලන්ට බොරු කියනවාට වඩා ලංකාවේ සිටින කොල්ලන්ට බොරු කීම පහසු වීම.(බොරුව පවසන්නේ කිසියම් වෙබ් අඩවියක් හෝ වෙන යම් මාධ්‍යයක් හරහා නිසා බොරුව අල්ලා ගැනීමට ඇති නොහැකියාව බොරු කීම පහසු වීමට ඇති හේතුවයි. )

• වැඩේ මාට්ටු වුනොත් පහසුවෙන් මුණු පොත් ගිණුම අක්‍රීය කිරීම හෝ දුරකතන අංකය වෙනස් කිරීම මඟින් සියලු සබඳතා පහසුවෙන් නවතා දැමිය හැකි වීම.

• එසේ සිදුකල විට පහසුවෙන් නැවත වෙනත් නමකින් මුණු පොත් ගිණුමක් හා අලුත් දුරකතන අංකයක් ලබා ගැනීමේ පහසුව.

ඔන්න ඕවා තමයි මගේ අධ්‍යයනයේදී මට තේරුම් ගිය කරුණු. මෙතන ලියවිලා නැති ඔයාලා දන්න තව කරුණු තියනවානම් සඳහන් කරන්න.

මේක කියවලා අපේ ගැහැණු උදවිය කලබල වෙන්න ඕනේ නෑ. හැම කෙල්ලෙක්ම මේ වගේ නෑ. මේ ජාතියේ කෙල්ලෝ ටික දෙනායි ඉන්නේ. හැබැයි ටිකදෙනා කරන හානිය නම් පොඩි නෑ.මොකද මේවට ගොඩක් වෙලාවට අහුවෙන්නෙත් අහිංසක කොල්ලෝ (මමයි මගේ යාළුවයි වගේ :D ) උන් එහේ ඉඳන් පාලුව මකාගන්න ආදරේ කරනවා. අපි මෙහේ ඉඳන් ඇත්තටම ආදරේ කරන්න ගිහින් පුක බිම ඇනගෙන උඩ බලන් ඉන්නවා. 

ආයෙත් කියනවා මේ දේවල් අදාල වෙන්නේ ඒ වගේ වැඩ කරන කෙල්ලන්ට විතරයි.
ආ තව දෙයක් එක පාර දෙන්නෙක්ට ආදරේ කරන්න සමහර කෙල්ලන්ගේ මානසිකත්වය වෙනස් කරන්න ඔය මම උඩින්ම දාලා තියන පින්තූරේ කට්ටිය ඉන්න චිත්‍රපටි මාලාව(twilight movie series) බෙහෙවින් දායක වුනා කියන එක මම සෑහෙන්න විශ්වාස කරනවා.

ප.ලි: මෙවන් ලිපියක් බ්ලොගයේ ලිවීමට මා හට අදහස පහල කළ උදිත් සහෝදරයාට මාගේ ස්තූතිය පිරිනමනවා.

මූණු පොතෙන් ආදරය සොයා යාම...

ඔන්න මුලින්ම කියන්නම් මේක ලියන මම(පූසා) මූණු පොතෙන් ආදරේ හොයාගෙන හොඳ පාඩමක් ඉගනගෙන ඉන්නේ.කොහොමින් කොහොම හරි මේ ලිපිය පූසා ලියන්නේ අත්දැකීම් සහිතවයි. වැඩි පුරසාරම් ඕනේ නෑ මම කෙලින්ම කතාවට බහින්නම්.මෙතනදී මම කතා කරන්නේ රටවල් දෙකක ඉන්න දෙන්නෙක් මූණු පොත හරහා ආදරය සොයා ගැනීම ගැන.

මුලින්ම කියන්නම් මූණු පොතෙන් ආදරවන්තයෙක්/වන්තියක් හොයාගන්න පුළුවන්. ඒ වගේම ඒ ආදරය විවාහය දක්වාම ගෙනියන්නත් පුළුවන්. දැන් කට්ටිය බලනවා ඇති නේද් මූ කොහොමද එහෙම කියන්නේ කියලා. මේකයි ඒකට හේතු තියනවා. මම ඉගනගන්න ආයතනයේ අපිට උගන්නන ගුරුවරයෙක් කිව්වා එයාහේ හොඳම යාලුවෙක් පෙම්වතිය හොයාගත්තේ මූණු පොතෙන්ය දැන් ඒ දෙන්නා විවාහ වෙලා තාම බොහොම සතුටින් ජීවත් වෙනවා කියලා. ඒක ලංකාවේ කතාවක්නේ. ලංකාවේ ඔය වගේ කතා බොහෝම අල්ප වුනාට ඇමෙරිකාව වගේ රටක් ගත්තොත් මූණු පොතෙන් අඳුරගෙන ආදරේ කරලා විවාහ වෙන එක බොහොම සාමාන්‍ය දෙයක් වෙලාලු දැන්  ඒ රටේ. හැබැයි ඉතින් ඒ විවාහ වල කල්පැවැත්ම ගැන කියන්න නම් පූසා දන්නේ නෑ. එහේ මොන ජාතියේ විවාහයක් වුනත් ඒකේ කල්පැවත්ම ගැන ඉතින් මොකට කතා කරනවද නේද?? ;)

මම විශ්වාස කරන විදිහට ආදරය කියන දේ රඳා පවතින ප්‍රධාන සාධකය වෙන්නේ විශ්වාසය.විශ්වාසය නැති වුන දවසට  ආදරේ රඳා පැවතුනත් ඒක බොහොම දුර්වල එකක්.දෙන්නෙක්ගේ විශ්වාසය ඇතිවෙන්නේ අදහස් හුවමාරු කරගැනීමෙන්. ඉතින් මූණු පොත කියන්නේ අදහස් හුවමාරු කරගන්න කියාපු තැනක්. මූණට මූණ මුණගැහිලා කතා කරනවා වගේ නෙමෙයි කිසිම චකිතයක් නැතිව කතා කරන්න පුළුවන්. ඒත් තියන ප්‍රශ්නේ මේකයි. හුවමාරු වෙන අදහස් වල අන්තර්ගතය ඇත්තද බොරුද කියලා දැන ගන්නේ කොහොමද?? ලොකු ප්‍රශ්නයක් නේද? ඔන්න දෙන්නෙක් එකිනෙකාව මුණගැහිලා කතා කරනකොට කතා කරන විදිහ අනූව මූණේ හැඟිම් ප්‍රකාශ වෙන විදිහ අනූව අපිට හිතා ගන්න පුළුවන් මේ කියනවා ඇත්තේ ඇත්තමද බොරුද කියලා. ඒත් මූණු පොතේ ඒ සෙල්ලම් බෑ. ඉස්සර මගේ සම්බන්ධයට මගේ හොඳම යාලුවා කිව්වේ LDR  කියලා. ඒ කිව්වේ Light Dependent Resistor කියන එකනම් නෙමේ ඔන්න. මිනිහාගේ අර්ථ දැක්වීමට අනූව ඒකේ තේරුම Long Distance Relationship කියන එකනේ. LDR එකේ තියන ප්‍රශ්නේ මේකයි අදාල කෙනා මූණු පොත හරහා කියන දේවල් ඇත්තමද බොරුද කියලා දැන ගන්න විදිහක් නැති එකයි.

හරි කොහොමින් කොහොමහරි දෙන්නා ආදරේ කරන්න පටන් ගත්තා කියමුකෝ. ඒ ආදරේ රැක ගන්න දෙන්නටම කටයුතු කරන්න වෙනවා මොකද  LDR එකක් නිසා පුංචි වැරැද්දක් වුනොත් ඒක අනිත් කෙනා බොහෝම තදින් දැනෙනවා. වෙන මුකුත් නිසා නෙමෙයි ළඟින් නැති නිසා. හිතන්න වුන වැරැද්ද අනිත් කෙනා ඔයාට බොරුවක් කිව්ව එක කියලා. ඔයා ඒක කොහොම හරි දැනගත්තා කියලා. එදාට ඔයාට හිතෙනවා මෙයා මට මේ වගේ බොරුවක් කළා. මෙයා ඉන්නෙත් ගොඩාක් දුරින් මට තව කොච්චර බොරු කියලා ඇද්ද කියලා. (මටනම් ඔය මම කිව්ව දේ හිතුනේ එයා මට හතර වෙනිපාරටත් බොරුවක් කළාට පස්සේ.) 

තව දෙයක් මූණු පොත හරහා ආදරේ කරන අයගේ විශ්වාසයේ සලකුණ වෙලා තියෙන්නේ මූණු පොතේ මුර පදය. (මීට ටික කාලෙකට කලින් මම දැක්කා පෙම්වතියගේ මූණුපොතේ මුරපදය යනු? කියන මාතෘකාව යටතේ පුදුම ලස්සන කවියක් ලියලා තිබ්බා "මට හිතෙන හැටියට" බ්ලොග් එකේ මේ තියෙන්නේ ගිහින් බලන්නකෝ) ඉතින් මම අත්දැකීමෙන් දන්න දෙයක් කියන්නම්. ඔයා ආදරේ කරන කෙනා ඔයාට මුර පදේ දෙනවනම් කිසිම හොරයක් නෑ හැබැයි ඔයා ඉල්ලුවත් මුර පදේ දෙන්නේ නැත්තම් එතන මොකක් හරි අවුලක් තියනවා. අමාරුවෙන් ඉල්ලන් පාවිච්චි කරන්න නම් එපා මට පිස්සු නොහැදී බේරුනේ නූලෙන්.

අවසාන වශයෙන් මම කියන්නේ මේකයි. ඔයාලා මූණු පොත හරහා දැන හඳුනගෙන ආදරේ කරන්න එපා කියලා නෙමෙයි මම කියන්නේ. මට එහෙම කියන්න අයිතියකුත් නෑ. මම කියන්නේ කරන දෙයක් බොහොම කල්පනාවෙන් කරන්න කියලා. මොකද ඇඟේ තුවාලයක් වෙන්වා වගේ නෙමෙයි හිතේ තුවාලයක් වුනොත්.

ප.ලි: මේ ලිපිය ජොලියට ආදරේ කරන අයට අදාල වෙන්නේ නෑ. එයාලා අනිත් කෙනා මොනව කලත් ගනන් ගන්නේ නෑනේ. 

මේ ලිපිය ලියලා ටිකක් කල්. පල කරනවද නැද්ද කියලා හිත හිතා හිටියේ. ඒ අතරේ ගොඩ කාලෙකට පස්සෙ මගේ හොඳම යාලුවෙක් එක්ක සෙට් වුනා. නෑ මම කිව්වේ හොඳම යාලුවෙක් මීට් වුනා. බලනකොට එයාටත් මට වුන සන්තෑසියමයි වෙලා තියෙන්නේ. 

Facebook Chick Love  Song- Rukshan Mark feat  Iraj Krishan Bk & Bertram

ඒ අස්සේ මේකටම ගැලපෙන සිංදුවකුත් ගොඩ කාලෙකට පස්සේ ආයේ මතක් වුනා. කොහේද මේ හාදයෝ මේ සිංදුව කළේ මීට අවුරුදු දෙකකට විතර කලින්. ඒ දවස් වල මේ සිද්ධි ලංකාවේ වුනේ බොහෝම අඩුවෙන්. මේ සිංදුව අද වගේ කාලෙක හැදුවනම් ආයේ නෑ ප්‍රසිද්ධ වෙයි නිකන්ම. මට මතක විදිහට මේ සිංදුව ඒ දවස් වල එච්චර ප්‍රසිද්ධ වුනේ නෑ.

ගැහැණියට ගරු කරපන්.........

ගැහැණියට

ගරු කරපන්

පාරේ තොටේ යන එනකොට

කරදරයක් වෙලා තිබුනොත්

උදව් කරපන්

අහක බලන් යන්න එපා

අනවශ්‍ය විහිළු තහලු

කරන්න එපා

කිසි කෙනෙක් ඉස්සරහා

අවමානයට ලක්කරන්න එපා

කිසිම දවසක 

අතක් උස්සන්න එපා

ඒක පිරිමි කමට නින්දාවක්

මොනම දෙයක් නිසාවත්

අපහසුතාවයකට පත්වෙන විදිහට

හැසිරෙන්න එපා

මොකද ඒ ගැහැණිය

උඹේ පෙම්වතිය නොවුනට

වෙන කාගේ හරි පෙම්වතියක්

උඹේ නංගී නොවුනට

වෙන කාගේ හරි නංගියෙක්

උඹේ අක්කා නොවුනට 

වෙන කාගේ හරි අක්කා කෙනෙක්

උඹේ අම්මා නොවුනට

වෙන කාගේ හරි අම්මා කෙනෙක්

වෙන්න පුළුවන් නිසා....

අම්මේ තාත්තේ ඔබට ආදරෙයි සැමදා..

දුකින් සිටින විටදි මා

මගේ දුකට සැබවින්ම දුක් වූයේ

ඔබ පමණි සැමදා

තුටින් සිටින විටදි මා

මගේ සතුටට  සැබවින්ම සතුටු වූයේ

ඔබ පමණි සැමදා

අසනීපයෙන් සිටී නම් මා

මගේ වේදනාවට සැබෑ කඳුලක් වැටුනේ

ඔබේ නෙතින් පමණි සැමදා

දිවි ඇති තෙක් මා

ඔබේ පිහිටට ඔබ වෙනුවෙන් සිටිනවා අම්මේ

ඔබට ආදරෙයි සැමදා

දුකින් සිටින විටදි මා

පිටට නොපෙන්නුවත් ඔබත් දුකෙන් බව

දනිමි මා සැමදා

තුටින් සිටින විටදි මා

පොඩි හිනාව ඔබේ ලොකු සතුටකට බව

දනිමි මා සැමදා

අසනීපයෙන් සිටී නම් මා

කඳුලු නැතත් දෙනෙතේ, හඩන බව සිතින්

දනිමි මා සැමදා

දිවි ඇති තෙක් මා

ඔබේ පිහිටට ඔබ වෙනුවෙන් සිටිනවා තාත්තේ

ඔබට ආදරෙයි සැමදා

මුදල් ඇති එකා ළඟ පහ හය හත අටය...

ඉවසන  දනා  රුපු  යුදයට  ජය   කොඩිය

මෙය  කිව්   එකාගේ  කට  කෑවත්   මදිය

ඉක්මන් වුනු එකා ළඟ පහ හය හත අටය

එකෙකුදු නැතුව මම තාමත් කොට උඩය

මම අහලා තියන විදිහට මේක ඉස්සර සරසවි කුරුටු ගීයක්. අද ඔය තත්වය ටිකක් වෙනස් වෙලා කියලයි මටනම් හිතෙන්නේ. අද මුදල් පස්සේ දුවන ලෝකේ හැම දෙයක්ම මුදලට යට වෙලා. හැම දේම කිව්වට ඉතින් හැම දේම නෙවෙයි. කොහොම හරි ඉතින් ඔන්න මට හිතුනා අර ඉස්සෙල්ලා තිබ්බ කවිය පොඩ්ඩක් වෙනස් කරන්න ඕනේ කියලා. 

මේ තියෙන්නේ මගේ අලුත් කවිය

ආලය මිලට කිසි දිනකදි ගත නොහැකිය

මෙය  කිව්  එකාගේ  කට  කෑවත්   මදිය

මුදල් ඇති එකා ළඟ පහ  හය  හත  අටය

එකෙකුදු නැතුව මම තාමත් කොට උඩය

දැන් අහන්න එපා කව්ද ආදරේ සල්ලි වලට ගන්න බෑ කිව්වේ කියලා :P මට ඇහිලා තියනවා ගොඩක් අය කියනවා ;)

මම මේ කියලා තියෙන්නේ අද දවසේ බොහෝ දුරට වෙන දේ. මම තාමත් විශ්වාස කරනවා ඔය මුදලට තියා කිසිම දේකට යට වෙන්නේ නැති සත්‍ය ප්‍රේමය(True Love) කියන එක ලෝකේ තාමත් වැඩිය නැතත් ලාවට හරි තියනවා කියලා.(මට කවදාවත් හම්බවෙලා නැතත් මම විශ්වාස කරනවා) කොහොම වුනත් අද පාරේ තොටේ ඇවිදගෙන යනකොට එහෙම සමහර වෙලාවට ඔය ආදරේ මුදලට ගත්තු උදවිය ඔයාලටත් දකින්න ලැබිලා ඇති.


සමහර අයටනම් මෙහෙමත් හිතෙන්න බැරි නෑ

ආදර     ලෝකය     බොහෝම     සුන්දරය

මෙය   කිව් එකාගේ   කට   කෑවත්     මදිය

තනිකඩ කාලේ මම නම් ෆුල් ජොලියෙන්ය

එකෙකුත් වැඩිය මම නම් දැන් කොට උඩය

ඔයාලටත් මේ කවිය තවත් වෙනස් විදිහට ලියන්න හිතෙනවා නම් හැමෝට පේන්නත් එක්ක ලියන්නකෝ පහලින්.

ආදරේ නැතත් දැන් පෞද්ගලික තොරතුරු ඔබේ නොපවසමි කිසිවෙකුට

නැතත් දැන් ආදරය

සොඳුරු මතක ඇත තවම

ඒත් මම කිසිම විට

ඔබේ පෞද්ගලිකත්වයට

හානිවන කිසිම දෙයක්

නොපවසමි කිසිවෙකුට

කල්පනාවෙන් සිටින්න

බොරු පෙම්වතුන්

හතරවට

ඩැහැගන්න බලා සිටී

ඔබ වැනි යුවතියන්

මගේම පෙර මිතුරෙකු විත්

උගේ මිතුරෙකුට යැයි

විමසුවා ඔබේ නොම්මරය

බිය නොවන් කිසිම විට

ඔබේ එක තොරතුරක්

මගේ හොඳම මිතුරාට වුව

නොදෙමි මම කිසිම දින

වෙනදා මෙන් නැතත් දැන්

ඔබට මම ආදරය...

ඔබව අතැර ගිය මා ලඟම ඇයි කඳුලු තවම?

සිහිල් පවන් රොදක් යැයි සිතා ආදරේ කළ නමුත්

චණ්ඩ මාරුතයක් යැයි දැනී අතැර ගියමුත්

සිහිල් පවනට ආදරේ කළ කාලය සිහිවෙයි තවත්

ඔබව අතැර ගියේ මා වුවද

ඇයි කඳුලැල් ඉතිරි වී මගේ දෑසේ තවත්

පරිගණකය දකිද්දී මැවෙන්නේ ඔබේ රුවයි

දුරකතනය වදිද්දී ඇසෙන්නේ ඔබේ හඩයි

ඔබව අතැර ගිය මා ලඟම ඇයි කඳුලු තවම

එදවස සොඳුරු මතකයන් නිසාද ඒ

චණ්ඩ මාරුත්යක් වී ඔබ

මගේ විශ්වාසයට කරපු විනාශය

අනේ ඔබ සැමදා සිහිල් පවන් රොදක් වී උන්නානම්........

මුස්ලිම් කෙල්ලෙක්ට පෙම් කරමි...

මුහුණ සළුවකින් දවටා නොසිටි              නිසා

සැකයක් තිබුනමුත් සිතුවෙමි සිහල         කියා

විමසුවේ මිතුරියකගෙන් සැක හරිනු        නියා

පැවසුවේ ඇය ඔබ මුස්ලිම්ය                  කියා

හිනැහෙන විට ඔබේ මුහුණ පුන්සඳ       වාගේ

ඇස අහකට ගන්න බෑ මුහුණෙන්        ඔබගේ

සිංහල නවකතා කියවන                    ඔබගේ

අත ගන්නට ඇත්නම් පෙර පිනකි         මාගේ

පවසන්නේ කෙලසද ආදරෙයි             කියාලා

අසාවි ඔබ ඔයාට පිස්සුදැයි                 කියාලා

ආදරේ හදවතේ සිරකොටම                 තබාලා

සඟවා සිටිනු කෙලස ඔබ දිහා              බලාලා

හදවතේ ඇති ආදරේ ඔබට            පැවසුවොත්

නැතිවිය හැක ඔබ මිතුරියක              ලෙසවත්

සිටිමි සඟවාගෙනම ආදරේ                  හටගත්

යාවි දිනෙක ඔබ සැඟවී නොදැන        මෙපවත්

අපේ රටේ දේශපාලනය...(මට හිතෙන හැටියට)

ඔන්න මුලින්ම කියන්නම් මට මේක ලියන්න හිතුනේ ටැබූ අය්යාගේ පොඩි එකාගෙ ලියුම -  අඩම්බොරුකාර තාත්තා ලිපියයි ඒකේ තියන අදහස් දැක්වීම් ටිකයි කියෙව්වට පස්සේ. ඔන්න මුලින්ම කියන්නම් මම දේශපාලනේට වැඩි කැමැත්තකුත් නෑ වැඩි අකමැත්තකුත් නෑ. ඒවගේම එක පක්ෂයකට කියලා එල්ලිලත් නෑ. මම රටට වැඩක් කරන ඕනෙම පක්ෂයකට සපෝට්. ඔන්න දැන් මේක කියවලා කට්ටිය මාත් එක්ක වලියට නම් එන්න එපා. මම බයයි. ඒ වගේම මේක මගෙ නිකන් අදහසක් විතරයි කවුත් රණ්ඩුවෙන්නත් එන්න එපා. හරි කොහොමහරි ඔන්න මම කතාව පටන් ගන්නවා.

දැන් ඇස් වහගන්න.......... දැන් මේ විදිහට හිතන්න. "ඔයා තමයි මේ රටේ ජනාධිපතිතුමා. ඒ වගේම ඔයාලා පැවත එන්නේ මතක ඇති කාලේ ඉදන් දේශපාලනේ කරන පවුලකින්. ඔයාට සහොදරයෝ සෙට් එකකුත් ඉන්නවා එයාලත් දේශපාලනේමයි කරන්නේ" හරි මට කියන්න බලන්න එයාලට ඔයා සලකන්නේ නැද්ද? එක කුස උපන් සහොදරයන්ට සලකන්නේ නැතුව වෙන කාට සලකන්නද? හරි බලන්නකෝ ඉස්සෙල්ලා හිටිය මැඩම් එයත් මල්ලි එයා ළඟට ආව වෙලේ සැලකුවේ නැද්ද? කවුරු ජනාධිපති උනත් අපි ඔක්කොම ලංකාවේ මනුස්සයෝනේ සහෝදර කැක්කුම උපරිමෙන්ම තියනවා. මම කියන්නේ මේකයි මොන කෙනා බලයට ආවත් අපේකම් වෙනස් වෙන්නේ නෑ. එහෙමනම් අපේකම ගෑවෙලාවත් නැති කෙනෙක් පත් කරගන්න වෙනවා.

හිතන්න බලන්න අද ජනාධිපති මේ ඉන්න කෙනා නෙමෙයි ඔයා සපෝට් කරන කෙනා කියලා. එහෙනම්?? අද ඔය රස්සා නෑ කියලා කෑ ගහන කට්ටිය නැති වෙයි කියලා කියන්න පුලුවන්ද? එහෙනම් රස්සා නැති කට්ටියව තවත් දේශපාලන පක්ෂයක් අල්ලගෙන එකතු වෙලා කෑ ගහන්න පටන් ගනීවි. ඇත්ත ඒක නෙවෙයිද? මම දැක්කා ටැබූගේ කතාවට wath අක්කා හොඳ උත්තරයක් දීලා තියනවා. තව සෝමවංස කියල හාදයෙකුත් ටිකක් තරහෙන් වගේ ලියලා තිබ්බා. හැබැයි මම හිතන්නේ නෑ ටැබූ අයියා ඒක ලිව්වේ ඉරිසියාවට කියලා. ඒ එයා හිතන හැටි. අපි ඔක්කොම එක එක විදිහට හිතන නිසා තමයි අපේ රටේ එක එක පක්ෂ ගොඩක් තියෙන්නේ. ඒ හැටි. 

ඊටපස්සේ හොරාගන්න ඒවා. ඒක ගැන ඉතිං කතා කරලා වැඩක් නෑ. අපේ රටේ විතරක් නෙමෙයි මුලු ලෝකෙම හැම රටකම වගේ තියන ප්‍රශ්නයක්. ඉතින් ඒක මොන පක්ෂයක් බලයට ආවත් වෙනස් වෙයි කියලනම් මම හිතන්නේ නෑ. කොහොම හරි කීයක් හොරකම් කළා වුනත් අද අපේ රටේ ඇහැට පේන්න ගුවන් පාලම් ටිකක් හරි තියනවා නේද? කඩන් වැටි වැටී හරි මොන පාලමක් හරි හදනවනේ ;) මොන මොනවා හරි සංවර්ධන කටයුතු ඇහැට පේන්න වෙනවා නේද? මටනම් ප්‍රශනයක් නෑ මොන පක්ෂේ හරි මීට වඩා වැඩක් කරයි කියලා හිතුනොත් මම ඒ පක්ෂයට ඡන්දේ දෙනවා.

දැන් මම කියන්න යන්නේ අපේ රජයේ විශ්වවිද්‍යාල වලට යන අයියලාව දේශපාලන පක්ෂ වලින් උසි ගන්නලා එයාලා කෑ ගහනවා පෞද්ගලික විශ්වවිද්‍යාල හදන්න එපාලු. ඒකටනම් මම තදින්ම විරුද්දයි. මේකයි හේතුව. උසස් පෙළ ලියන්න  ආසන්නව 350,000ක් වාඩි වෙනවා, ඒකන් පාස් වෙන්නේ 180,000ක් විතර ඒකෙනුත් රජයේ විශ්වවිද්‍යාල වලට ගන්නේ 20,000ක් විතර. එතකොට ඉතිරි 160,000ට මොකද වෙන්නේ. එතන ඉන්න සමහර අය Z ලකුණ දශම ගානක් මදි වුන අය. ඉතිං හිතලා බලන්න එයාලට යන්න පෞද්ගලික විශ්වවිද්‍යාල තිබ්බාම මොකද වෙන්නේ. ඒ කෑ ගහන්නේ ඉරිසියාව හින්දද කියන්න මම දන්නේ නෑ. කොහොම වුනත් අද ලෝකේ ඉල්ලුම තියෙන්නේ දක්ෂයන්ට ඉතින් කවුරුත් මොකටද බය වෙන්නේ. තමන්ගේ උපරිමෙන් වැඩ කරනවා මිසක්.

මේ ලිපිය ලිව්වේ ටැබූ අයියා ලිව්ව එකින් එක අරන් විවේචනය කරන්නනම් නෙමේ. කියෙව්වම ඕන කෙනෙක්ට තේරෙනවනේ එයා කිව්ව හැමදේම මෙතන නෑ. මේ මගේ අදහස් ටිකක් විතරයි.  හැබැයි මේක ලියන්න හිතුනෙනම් ටැබූ අයියගේ ලිපිය කියෙව්වම. කොහොම උනත් දැන් මේ බලයේ ඉන්න අය කරන සාධාරණීකරනය  කරන්න බැරි වැරදි ඕන තරම් තියනවා. මොන පක්ෂේ ආවත් එච්චරයි. ලෝකේ කොහේ හරි වැරදි මුකුත්ම නැති පක්ෂයක් බලයේ තියනවද?

කවදා හරි දවසක ඇත්තටම අපේ රට ගැන හිතන, ආණ්ඩු පක්ෂයේ වුනත් විපක්ෂයේ වුනත් හොඳ දෙයක් කරන පක්ෂයක් ඇතිවුනොත් ආයේ කතා දෙකක් නෑ මම ඒ පක්ෂයේ.

අනේ ඉතිං මේක කියවලා ඔන්න මාත් එක්ක තරහා වෙන්නවත් රණ්ඩු වෙන්නවත් එපා. කඩේ ගියා වුනාට කඩේ ගියා කියන්නත් එපා ;)

නොදන්න දේශපාලනයක් ගැන කතා කරන්න ගිහින් මට කෙළවෙයිද මන්දා.... බයත් හිතෙනවා

අද කාලේ නාටක.....( ගොන් දෙපැය )

ඊයෙ මට හොඳටම උණ ගැනිලා හරිම අමාරුවෙන් හිටියේ. බෙහෙත් එහෙම අරන් ඇවිත් ඔහේ වාඩි වෙලා හිටියා. වැඩක් කරන්නත් බෑ ඇඟට අමාරුයි. ඔන්න  වෙලාව 8.00 යි. 

ඉතිං අපේ ගෙදර කට්ටිය ප්‍රවෘත්ති බලන්න ගත්තා. බලන්නේ ශ්‍රිලාංකීය අභිමානය චැනල් එකේ. ඒක නම් මමත් හැමදාම වගේ බලනවා. ඒකෙත් ගියේ පරණ දේවල්මයි. විපක්ෂේ ආණ්ඩුවට මඩ ගහනවා. ආණ්ඩුව විපක්ෂෙට මඩ ගහනවා. සමහර වෙලාවට ඒක බලන එක කොමඩි ෆිල්ම් එකක් බලනවාටත් වඩා හිනා යන දෙයක්.ඔන්න ඒවා ඉවර වෙලා පිටරට වල වෙන දේවල් පෙන්නනවා. යකෝ එහෙ කියලාත් වෙනසක් නෑ මෙහේ වගේ මයි. වලිම තමයි. කීඩෑ පුවත් එහෙමත් ඉවර වෙලා පටන් ගත්තා ගොන් දෙපැය  බලන්න.(මම මෙතන "ගොන් දෙපැය" විදිහට හැදින්නුවේ එක නාලිකාවක් ඉලක්ක කරන් නෙමෙයි ඔන්න. ඉස්සර ඔය සංකල්පේ එක නාලිකාවක විතරක් තිබුණට අද ගොඩක් ඒවායේ තියනවානේ.)

ඔය නාට්ටිවල නම් කියන්නනම් මට මතක නෑ. කොහොම හරි බලන්නේ ස්වාදීනේ.කොහොම හරි කට්ටිය නාට්ටි බලන්න පටන් ගත්තේ 7.30ට. මම ටීවී එක ලඟට ගියේ නම් 8.00ට. ඉතිං 8.30 වුන ගමන්ම පටන්ගත්තා. මමත් ඔහේ බලන් ඉන්නවා. මෙන්න නාට්ටියේ දන්න කියන කෙනෙක් ඉන්නවා. වෙන කවුරුත් නෙමෙයි අර රෙදි හොරකම් කරපු කෙනා. ඒ කතාවත් ඉතිං අනිත් ඒවා වගේමයි. කෙල්ලයි කොල්ලයි දුෂ්ඨයයි. බලන් ඉන්න කම්මැලියි වගේ. අමාරුවෙන් නැගිටලා ගියා බ්ලොග් එකක්වත් කියවන්න කියලා.

පැය බාගයක් විතර බ්ලොග් ටිකක් කියව කියවා හිටියා. ඇඟට පට්ට අමාරුයි. එක තැනක ඉන්නත් බෑ වගේ. ආයෙත් ගියා සාලේ පැත්තට. කට්ටිය තාමත් නාට්ටි බලනවා. ඉස්සෙල්ලා එකමද කොහෙද තාමත් යන්නේ. මම ගිහින් වාඩි වුනා. මාර වැඩේ ඉස්සෙල්ලා ආදරවන්තයගේ තාත්තා මේ පොඩ්ඩට දුෂ්ඨයාගේ තාත්තා වෙලා. දුෂ්ඨයාගේ යාලුවෝ සෙට් එකත් වෙනස් වෙලා. මොකක් හරි අවුලක් තියනවා. මම වෙලාව බැලුවා. 9.15 නේ මේ වෙන නාට්ටියක්නේ. ඔල්මාදේ හැදෙනවා මෙවා බලන්න ගියාම.

අද කාලේ රූපවාහිනි නාලිකා වලට ආවේනික නළු නිළියො ඇති වෙලා. ඉතින් එක නාලිකාවක යන ඔක්කොම නාට්ටිවල ඉන්නෙ එකම නළු නිළි සෙට් එක. ඉතිං කවුරු හරි එකම නාලිකාවක නාට්ටි විතරනම් බලන්නේ නාට්ටි ඔක්කොම පැටවෙලනවා ෂුවර්. ඒක නිසා නාට්ටි බලන උදවියට මම අනුමත කරන්නේ එකම චැනල් එකේ නාට්ටි බලන්නේ නතුව එක එක චැනල් වල නාට්ටි බලන්න. නැත්තම් කාලයක් යනකොට එකම කට්ටිය දැකල දැකලා එපා වෙන්න බැරි නෑ. 

ප.ලි : කාලයක් අපේ ගෙදර උදවිය බැලුවේ අර මළගෙදර(මහ ගෙදර ) කියන එක. ඒක බලන එක නැවතුනේ කට්ටියට එපා වුන නිසානේ. ඒ කතාවනම් තාමත් යනවද මන්දා. ඒකනම් බලන්න ගියාම එපා වෙනවා එකේ කොල්ලො කෙල්ලො අඩනවට වඩා දෙයක් නෑ.

පුදුම වෙන්න එපා.....

පැතුවේ සිටින්නයි දිවිය පුරා

සෙව්වේ බැලුවේ ඔබ ගැනමයි

ඉඩ ලැබෙන හැම මොහොතක් පුරා

ගානක් නැති වූවා ඔබට ඒ කිසිවක්

වටී ඔබට මූණු පොත් මිතුරු කැල මට වඩා

බලා සිටියෙමි සැමදා රාත්‍රිය එළබෙන තුරා

දොඩන්නට ඔබ සමඟින් 

තුටින් හිනැහෙමින් රාත්‍රිය පුරා

ගානක් නැත ඔබට ඒ කිසිවක්

මාළු හුරතල් කරයි අදහස් දක්වයි මූණු පොත පුරා

හැම දිනයකම මගේ අරමුණ වූයේ

සතුටින් තබන්නයි ඔබ දිනය පුරා

ඒත් ඔබ දුකෙන්ය සැමදා

වෙනත් උන් පිළිබඳව සිතා

නැත කිසිදින ඔබ හට මුසාවක් කියා

ඇයි බොරු කලේ ඔබ මට නොසිතූයුරා

වරක් දෙවරක් නොව තෙවරක්ම

මම ඔබට සමාව දුන්නා

සිව්වන වර ඔබ කලේ බොරුවක් පමණක් නොවේ

සෙල්ලම් කිරීමයි මගේ ආදරේ පරදුවට තබා

දැනගත් දා එපුවත් බිඳුනු හදවත මගේ

හදනු බෑ යලිත් කුමක් කළත්, කීවත් ඔයා

තවමත් මතකයි ඒ දිනය පුරා

හැඩුවා මම කුඩා කලවත් නැත් එතරම් හඩා

තද හිතක් ඇති පිරිමියෙක් වුවත් මෙමා

කුමක් කරන්නද හැඩෙනවා නම් හඩනු විනා

දැන් ඔබ කවි ලීවත් බ්ලොග් පිටු පුරා

යලි අපි අපේ නොවේ මෙන් පෙරදින එදා

ඔබ තුට්ටුවකටවත් මායිම් නොකළ මගේ ඒ ආදරේ

රැදී නැත එදා මෙන් මගේ හදවත් පුරා

එදා මා පෑ ආදරේ සිහියේ තබා

අද වන දේ ගැන ඔබ පුදුම වන්නට එපා

ලංකාවේ ප්‍රථම පෙම් උයන හා මම...

ෂා නියමයි........ කියලා වැඩක් නෑ

පෙම් උයනක් හදන්න යනවලු

දැන් ඉතිං කිසි කරදරයක් නෑ

පාඩුවේ පෙම් කරන්න පුලුවන්

කොහෙද ඉතිං 

බලන්නකෝ අදටත්

ආදරේ කරන දෙන්නෙක්ට

කතා කර කර ඉන්නවත්

තැනක් තියනවද රටේ

උයන හැදුවමනම් 

ඒ ප්‍රශ්නේ ඉවරයි

ඒත් ඉතිං

ලොකුම ප්‍රශ්නේ මේකයි

උයන් කීයක් හැදුවත්

ඒවයේ ඇවිදින්න යන්න

කෝ මට පෙම්වතියක්? :((((

අපි දෙන්නා තනියම රාත්‍රියක.............

මම කවදාවත් හිතුවේ නෑ මට මෙච්චර ලස්සන කෙල්ලෙක් ලැබෙයි කියලා. ඊටත් වඩා එයත් එක්ක මුහුදු වෙරළ අයිනේ රෑක තනියම එයයි මමයි විතරක්.. හරිම පුදුමයි මට හිතා ගන්නවත් බෑ අපි දෙන්නා කවදාවත්ම හිතුවේ නෑ මේ වගේ දවසක් මෙච්චර ඉක්මනට උදාවෙයි කියලා. කොහොම වෙතත් අද ඒ දවස උදා වෙලා......අපි දෙන්නා විතරයි වෙරළේ. ළඟින් තුරුල් වෙලා ඈත මුහුද දිහා බලාගෙන වචනයක්වත් කතා නොකර අපි ගොඩාක් වෙලා හිටියා. 

මම හැරිලා එයාගේ මූණ දිහා බැලුවා. පුංචි කෙස් රොදක් මූණට වැටිලා. මම හිමීට කෙස් රොද එයාගේ කන අයිනෙන් පිටිපස්සට කළා. එයා හැරිලා මගේ දිහා ආදරෙන් බලන් හිටියා. ඒ ලස්සන ඇස් දෙක.... හඳ එළිය වැටිලා දිළිසෙනවා දියමන්තියක් වගේ. ටික මා දිහා බලන් ඉඳලා මගේ පපුවට තුරුල් උනා. අපි තුරුල් වෙලා පැයක් විතර හිටියා. එයා ආයෙත් හැරිලා මා දිහා බැලුවා මගේ මූණට හිමීට හිමීට ළං වුණා. 

"පුතා! පුතා! මේකා කාලා කාලා දැන් දවල්ටත් නිදියන්න පුරුදු වෙලා... නැඟිටිනවා වතුර බාල්දියක් හලන්න කලින්"

අම්මගේ කෑගැහිල්ලට මම උඩ ගිහින් ඇහැරුනා.....
කෙල්ලෙක්වත් නැති මටත් පේන දවල් හීන මටම හිනා ගියා.
සාලෙට ගිහින් මගේ කැමතිම සිංදුව දාගෙන ඇහුවා... ඔයාලත් අහලා බලන්න........



Shayne Ward - Gotta Be Somebody ( Official Music Video HD )

Shayne Ward – Gotta Be Somebody Lyrics

This time I wonder what it feels like

To find the one in this life

The one we all dream of

But dreams just aren’t enough

So I´ll be waiting for the real thing.

I’ll know it by the feeling.

The moment when we´re meeting

Will play out like a scene straight off the silver screen

So I`ll be holdin’ my own breath

Right up to the end

Until that moment when

I find the one that I’ll spend forever with

`Cause nobody wants to be the last one there.

‘Cause everyone wants to feel like someone cares.

Someone to love with my life in their hands.

There`s gotta be somebody for me like that.

`Cause nobody wants to do it on their own

And everyone wants to know they´re not alone.

There’s somebody else that feels the same somewhere.

There`s gotta be somebody for me out there.

Tonight, out on the street out in the moonlight

And dammit this feels too right

It´s just like Déjà Vu

Me standin’ here with you

So I´ll be holdin`my own breath

Could this be the end?

Is it that moment when

I find the one that I’ll spend forever with?

ආදරේ සුපෝඛබෝගී සතුන්ට විතරද?

ඇගේ ලඟ ඇත 

නෙක නෙක විසිතුරු බලු රැලක්

ලොම් දිග පූසන් දුසිමක්

ඇයි මෙච්චර සත්තු

විමසුවොත් කිසිවෙක්

මම සත්තුන්ට ගොඩාක් ආදරෙයි

පවසයි ඇය ආඩම්බරෙන්

ලක්ෂපති තරුණිය දිනක්

බසින විට කාරයෙන්

ලොම් හැලුනු නකුටු බැල්ලක

ආවේ වලිගය වනමින්

සිතමින් කුස පුරාවාගන්නට

ලැබේ යැයි බත් ඇටයක්

"චීයා" මරහඩ නගමින් ඇය

"මේ ජරා සතාව එළවපන්"

ඩ්‍රයිවර තැනට කෑ ගැසුවේ

ඇගේ ආදරේ ලැබෙන්නේ

ලස්සන සුපෝඛබෝගී සතුන්ට

පමණක් නිසාද?

ලොම් හැලුනු අසරණ බැල්ල

සතෙක් නොවේද?

හදවතක් නොමිලේ දීමට තිබේ.............

උස අඩි 5 අඟල් 8 ට නොවැඩි, දුටුවන් පයිත්තියන් වන තරමට නැතත් තරමක් පියකරු, අවංකව ආදරේ කළ හැකි, කිසිම විටෙක මා හට මුසාවක් නොකියන (ආදරේට පුංචි එකක් කීවාට කම් නැත ), යහපත් ගති ගුණ වලින් හෙබි, වයස අවුරුදු 21 ට නොවැඩි අවංක තරුණියකට මගේ හදවත නොමිලේ දීමට තිබේ.

ප.ලි : ජාති-ආගම්, කුල-මල, මුදල්-හදල්, යාන-වාහන, වතු-පිටි, ඉඩ-කඩම් කිසිවක් සලකනු නොලැබේ.

සයිබර් සබඳකම්...........

දුරින් ඉන්න නිසා බොරු කියන්න පුලුවන්

දුරින් ඉන්න නිසා බොරු කරන්න පුලුවන්

දුරින් ඉන්න නිසා ඒ දේවල් හොයන්න බැරි

බොරු කරන්න කියාපු සබඳකම

සයිබර් සබඳකම

පොටෝ සාප්පුව පිහිටෙන් ලස්සන පින්තූර හදලා

ලෝකෙ නැති දේවල් කියලා කාවහරි රවටගෙන

XOXOXO , <3 , :* , 831 වගේ දේවල් යවලා

බොරුවට ආදරේ කරන්න කියාපු සබඳකම

සයිබර් සබඳකම

ඉස්සර ආදරේ තොරතුරු හොයන්න

බොරු නමකින් ගිණුමක් හදාගෙන

කොහොමහරි එයාව add කරගෙන

පරණ කුණු අවුස්සන්න කියාපු සබඳකම

සයිබර් සබඳකම

කවුරුහරි තරහ කාරයෙක් ඉන්නවනම්

එයාගෙ නමින් බොරු ගිනුමක් හදලා

ඒ කෙනාව පුලුවන් තරම් අමාරුවේ දාන්න

පළිගන්නවනම් කියාපු සබඳකම

සයිබර් සබඳකම

(සැ.යු: මෙම ලිපිය ලිව්වේ මෙවන් වූ අසික්කිත වැඩ කිරීමට දිරිගැන්වීමක් වශයෙන් නොව, මෙවන් වූ ක්‍රියා සිදුකරන පහත් පෙලේ පුද්ගලයන් සිටින බවත්, එවන් අයගෙන් ප්‍රවෙශම් වන ලෙසටත් ඔබව දැනුවත් කිරීමටයි. තවද කිසිම දිනෙක මෙවන් වූ පහත් ක්‍රියා නොකරන ලෙසටත් ඔබෙන් ඉල්ලා සිටිනවා)

relationship status වෙනස් වුණා.........

fb එකේ ඇය හමුවූවා

අපි chat කෙරුවා

relationship status වෙනස් වුණා

පූසා went being "single" to "in a relationship" 

සුන්දර කාලය නිමවූවා

එක එක ප්‍රශ්න ඇතිවූවා

relationship status වෙනස් වුණා

පූසා went being "in a relationship" to "it's complicated"

කාලය ගත වූවා

ඇගේ විගඩම් ඇති වූවා(සමහරුන්ට නම් "ඇය නැති වූවා")

relationship status වෙනස් වුණා

පූසා went being "it's complicated" to "single" 

හිතට දුක දැනුනා

fb ඇති වූවා

status update කළා

hey frndz am gonna deactivate ma fb account :(

කාලය ගත වූවා 

අඳුරු මතකයන් නැති වූවා

fb status update කළා

hello frndz am back :)

මට හොඳයි මගේ සුපුරුදු තනිකම.....

ආදරය සහ ජීවිතය......

දැනෙන විට ආදරේ සතුටක්ය ජීවිතේ

නොලැබුනොත් ආදරේ දුක දැනේ ජීවිතේ

ලැබෙන විට ආදරේ සතුටක්ය ජීවිතේ

බිඳෙන විට ආදරේ දුක දැනේ ජීවිතේ

විදින්නට සුව ජීවිතේ ඕනෑය ආදරේ

දුකය මේ ජීවිතේ නැති වුනොත් ආදරේ

සදා සුව ජීවිතේ නොබිඳෙනා ආදරේ

කෙදින හෝ ජීවිතේ ලැබේ ඒ ආදරේ

නොබිඳෙනා ආදරේ ලැබෙනතුරු ජීවිතේ

සොයමු ඒ ආදරේ තුටින් සිටිනට ජීවිතේ

ලැබේ ඒ ආදරේ යම් දිනෙක ජීවිතේ

ලැබූ ඒ ආදරේ රැකගන්න පුරා ඔබේ ජීවිතේ

අපරාදේ පස්සෙන් ගියේ................

අපේ ආදරේ අනතුරේ.........

ආදරෙයි මම ඔයාට......................

කෙල්ලනේ බය වෙන්න එපා.......

Life...............

Don't hurt me..........

It's your fault..........

මට බෑ බලන් ඉන්න ඔය විකාර.............

ඇයි????????